Skip to content

896 2605

kjartanmagg@gmail.com

Kjartan Magnússon

Frumkvæði, þekking og reynsla

  • Greinar
    • Blaðagreinar
    • Borgarmál
    • Fjölmiðlar
    • Íþróttir
    • Menning
    • Ræskingar
    • Stjórnmál
  • Greinar
    • Blaðagreinar
    • Borgarmál
    • Fjölmiðlar
    • Íþróttir
    • Menning
    • Ræskingar
    • Stjórnmál

Hrein borg – fögur torg

maí 23, 2012júlí 19, 2012 Kjartan MagnússonBorgarmál, Óflokkað

Skóla- og frístundaráð samþykkti á síðasta fundi sínum tillögu Sjálfstæðisflokksins um að auka fræðslu í grunnskólum Reykjavíkur um mikilvægi þess að halda borginni hreinni. Eru skólastjórar hvattir til að virkja nemendur í að hreinsa í kringum skólana og tína rusl í nágrenni þeirra, enda hefur slíkt ótvírætt fræðslu- og uppeldisgildi.

Brýnt er að vinna stöðugt að því að draga úr óþrifnaði í Reykjavík og virkja sem flesta í því skyni. Oft er bent á að borgin sé á meðal hinna þrifalegustu í heimi, ekki síst vegna nýtingar okkar á hreinum orkugjöfum til húshitunar og annarra daglegra þarfa. Það er vafalaust rétt en almennum þrifnaði í borginni er hins vegar víða ábótavant. Það er sameiginlegt verkefni okkar allra að sjá til þess að Reykjavík komist einnig í fremstu röð að þessu leyti.

Ekki síst þarf að stuðla að jákvæðu viðhorfi barna og ungmenna til umhverfismála og vinna þannig gegn óþrifnaði og sóðaskap. Í mörgum leikskólum, grunnskólum, frístundaheimilum, og félagsmiðstöðvum er unnið gott starf við að vekja börn til vitundar um þessi mál. Sjálfsagt er að tryggja að enginn skóli verði út undan í þeirri vinnu og skoða leiðir til þess að jákvæður áróður í þágu þessara mála verði bættur og gerður markvissari.

Í einhverjum tilvikum eru nemendur látnir þrífa í kringum skólana með reglubundnum hætti og jafnvel tína rusl í nágrenni þeirra. Nýlega var t.d. haldinn sérstakur hreinsunardagur í Hagaskóla þar sem nemendur létu til sín taka og tíndu rusl víða í hverfinu. Þetta fyrirmyndarverkefni hafði ótvírætt fræðslu- og uppeldisgildi og vakti mikla athygli og ánægju meðal íbúa hverfisins.

Á síðasta kjörtímabili samþykkti menntaráð að árlega skyldi efnt til svokallaðra umhverfisdaga í grunnskólum Reykjavíkur, sem skilgreindir yrðu sérstaklega sem grænir dagar á skóladagatali. Annar dagurinn skyldi tengdur hreinsun og fegrun umhverfisins og er ákjósanlegt að tengja slík hreinsunarverkefni skóla þessum degi.

– – –

Greinin birtist upphaflega í Morgunblaðinu 23. maí 2012.

Leiðarkerfi færslu

Fyrri: Á að hrekja verslunarrekstur úr miðborginni?
Næsta: Þrír góðir!

Síðustu færslur

  • Kærar þakkir fyrir gott prófkjör
  • Minnkum báknið – Fækkum borgarfulltrúum
  • Ég bið um 2. sæti

Efnisflokkar

  • Blaðagreinar
  • Borgarmál
  • Fjölmiðlar
  • Hverfi
  • Íþróttir
  • Menning
  • Óflokkað
  • Ræskingar
  • Stjórnmál
Kjartan Magnússon í 2. sætið í Reykjavík 2022