Ég þakka Reykvíkingum kærlega fyrir góðan stuðning í prófkjöri Sjálfstæðisflokksins. Forvalið var fjölmennt og sýndi vel hinn mikla hljómgrunn, sem sjálfstæðisstefnan nýtur meðal borgarbúa og mikinn kraft sem býr í reykvísku sjálfstæðisfólki. Hlaut ég örugga kosningu í 3. sætið. Í heild fékk ég 3.224 atkvæði eða 61% gildra atkvæða. Ég er mjög þakklátur fyrir þetta traust.

Innilegar þakkir fá einnig hinir mörgu stuðningsmenn, sem aðstoðuðu mig í baráttunni, t.d. með símhringingum, dreifingu bæklinga og meðmælum við vini og kunningja. Þessum árangri hefði ég ekki náð án þeirra hjálpar. Öðrum frambjóðendum óska ég til hamingju með árangurinn og hlakka til að vinna með þeim að því að gera góða borg enn betri. Nú snúum við bökum saman og látum glæsilegt prófkjör marka upphaf að kröftugri baráttu fyrir borgarstjórnarkosningarnar 14. maí.